ای جان بد نیمدن چیخ

 ای جان بدنیمدن چیخوب اوچ صحن و سراده

گیت ، گَل ،  قاناد آچ گنبد و گلدسته آراده

آزاد ایت اوزون توپراقا بنزَر بدنیمدَن

سیندیر قفسی ، قورتار اوزون ، ایله اراده

قوزان او قیزیل گنبدی بیر نیچّه فیریلّان

اُول گنبد و گلدسته آرا سعی و صفاده

چیک بورنو وا خوش ای لَری قالخور  یِر اوزوندن

بیل واردی بهشت عطری خراساندا رضا ده(ع)

آچ  گوزلریوی  باخ  آشاقا ، پنجره  دالدا

گور بیر نیچه امّید ایله گوزلردی هواده

قوی بیر قولاقون دوشلره سَن سَسلره هوش ویر

عشق ایله اورک دردی گلوبلَر نیجه داده

واردور اوره گینده هره نون دردلری آمّا

قویمور اولاری ، عشق و محبّت ، گله یاده

گَلجَک دیله " ای جیرانا ضامن " ادب ایله

گوزدن گیچیری بیر آقا ، گیز لَنمیش عبا ده

یانموش جیگری ،کوچه ده آهی اوجالانمیش

کیملَر اینانار قالمیش  اوزوم  زهر جفا ده

دوتموش اوزینی حسرت ایله یثربه ساری

گَلمََک لیگه  یوللور سَسینی  اوغلی جواده

گَل واجب اولوب گلمه گین، ایستَر چیخه جانیم

غربتده قویولّار منی قبره نه مناده

بوندان بیله گوزدَن یِرَه یاش یاغدیراجاخلار

سرو ایله صنوبر داغ و داشلار بو عزاده

عظیم سرودلیر

پنجشنبه

15 / 10 / 1384 مطابق با چهارم ذوالحجّه 1426

مشهد مقدّس